10501 - 10600

10501. మౌనం గలగలలాడిందంటే మాటలున్నాయనే అర్ధం..
తీరం అల్లాడుతోందంటే అలల గుసగుసలకనేగా..

10502. విషాదం గ్రహపాటయ్యింది..
సంతోషాన్ని దూరం చేసినందుకు కాలం..

10503. భవిష్యత్తు బెంగ తీరిందిప్పుడే..
వర్తమానంలో కలిసి అడుగేద్దామన్నావని..

10504. మేఘమాల కోలాహలం..
చినుకై కురిసి జీవధారగా ప్రవహించాలని..

10505. విరిగిన మది..
అతికించే బంధమేదీ ఇంకా ఏర్పడనట్టుంది..

10506. పారిజాతమై అలరిస్తా..
పండువెన్నెల్లో పూలదుప్పటి పరవమని నువ్వంటే..

10507.గుప్పెడు వెన్నెల పులిమినట్టుంది..
నా స్వప్నాలన్నిటా నువ్వుదయిస్తుంటే..

10508. నీ స్మృతుల్లో నేనో ఖైదీనే..
నిన్ను తలవని క్షణాలు రోదిస్తుంటే..

10509. వసంతం ముందడుగేసింది నిజమేనేమో..
మనసంతా మల్లెపూలు గుప్పుమంటున్నందుకు..

10510. చీకటి రాత్రి ఏకాంత క్షణాలివి..
నాలో పరిమళాలు నీ జ్ఞాపకాలిప్పుడు..

10511. ఈ వేకువనాశించిందే..
కలవైన నువ్వు వాస్తవమై ముందుకొస్తావని..

10512. క్షణాలనెందుకు తలుచుకుంటావో..
నేనిక్కడ యుగాల లెక్కల్లో నిరీక్షిస్తుంటే..

10513. వర్తమానం విశేషమే..
భవిష్యాత్తు భవ్యమనిపిస్తూ..

10514. మనసందుకే కరుగుతున్నట్టుంది..
వెన్నగా నన్ను అభివర్ణించగానే..

10515. కన్నుల సరిహద్దుల్లో కన్నీళ్ళు..
నిన్నటి ఆనందాలు ఒలికిపోయినందుకేమో..

10516. వలపంటేనే మధురం..
ఇన్నాళ్ళకి మనసు నవ్వింది నిజం..

10517.  మధూదయమంటే ఇదే..
నీ మాటలతో నాకు మేలుకొల్పులవడం..

10518. శూన్యమే కొసమెరుపైంది..
నీ జ్ఞాపకాలొక్కటీ నాకు మిగిలి..

10519. నా సంతోషమొక్కటే..
ఊపిరున్నంతసేపూ నువ్వే..

10520. కాలం అలసిపోతుందిప్పుడు..
తలపుల్లో నిన్ను దూరం చేయలేక..

10521. అనురాగానికున్న ఆరాటం తెలిసింది..
నువ్వెన్ని సంకీర్తనలు పాడుతున్నా..

10522. విషాదం కనుమరుగయ్యింది..
కలలో నువ్వొచ్చి ఇద్దరం చెరిసగమన్నాక..

10523. నిన్నేసిన నాలుగడుగులే..
రేపటికి ఏడడుగులుగా పాదాలు కదుపుతుంటే..

10524. వర్తమానం పరిమళిస్తుంది..
గతంలోకి మనసు జారినప్పుడల్లా నీవల్లే..

10525. నా మనసెప్పుడో నీదయ్యింది..
ఏకాంతం మనల్ని కలపాలిప్పుడంతే..

10526. నల్లనివే నే రాస్తున్న అక్షరాలు..
తెల్లటి నీ మనసుని ప్రతిబింబిస్తున్నా..

10527. దాచుకున్న తలపులు కనిపెడతావెలానో..
నువ్వో ఇంద్రజాలకుడివి కాదంటూనే..
10528. అతిశయమంటే అలుగుతుంటావు..
అందానికున్న ఉపమానాలన్నీ నాకే అంటగడుతూ..

10529. అదేం మౌనమో..
మాటల్లోకి అనువదిస్తుంటే మనసు మండిపోతూ..

10530. అక్షరాల పరవశాన్ని తొలిసారిగా చూస్తున్నా..
నిన్ను రాసిన ఆనందాలు పదివేలుగా..

10531. నా మనసంతా ఆవేదన నిజమే..
మరుపు మందుంటే పూయాలిక సత్వరమే..

10532. జీవితమంతా శూన్యమేనిక..
నిశ్శబ్దం నేస్తమయ్యాక..

10533. మనసంతా ఈ వెలుగులెందుకో..
నీ నవ్వులు నక్షత్రాలైనందుకేమో..

10534. కథలుగా రాసుకోవాలిక..
కలలు నిజమయ్యేదెప్పటికీ జీవితంలో ఉండదుగా..

10535. తీయదనాన్ని ఆస్వాదించలేము..
జీవితంలో అప్పుడప్పుడైనా వేదనలు తడమకపోతే..

10536. అలికినట్టున్నప్పుడే అనుకున్నా..
నీ పదాల్లో నా ప్రస్తావన ఎక్కడా లేదేమోనని..

10537. నిన్ను ఆకర్షించడమే నాలో ప్రత్యేకత..
మనసు తలుపు తెరుచుకుందంటే ఏమనేదిప్పుడు..

10538. కదిలిపోయిన మేఘంలా నువ్వు..
సందేశమేదీ నాకు వినిపించకుండానే..

10539. కాటుకల మాయనుకుంటా..
నా కన్నులతో నీ సంభాషణలు..

10540.

అపురూపమైన జ్ఞాపకమనుకున్నా..
కన్నీరు ఎరుపురంగులోకి మారక మునుపు..

10541. గతమంటే ప్రేమందుకే..
నువ్వంతా నిండున్నావని..

10542. లక్షలతో అర్చించినట్టుంది..
నీ పలుకులతో పరవశాలు పురివిప్పుకున్నందుకు..

10543. నిత్యవసంతమే నాకిక..
నీ కన్నుల్లో ఆశ్రయం దొరికినందుకు..

10544. నీ రాకనెప్పుడో పసిగట్టా..
నిద్ర చెడగొట్టేందుకే మదినంటావని..

10545. వర్తమానాన్ని ఆస్వాదిస్తున్నా..
ఊహించకుండానే నీ సాన్నిహిత్యం దొరికిందని..

10546. జ్ఞాపకాలు ఊపిరైనందుకేమో..
నాలో రాగాలకో పల్లవి దొరికిందిప్పుడు..

10547. నింగీనేలా ఒకటేననిపిస్తుంది..
దూరానున్నా నువ్వూ నేనూ ప్రేమైనందుకు..

10548. కలలేవీ రావిప్పుడిక..
నా నిద్దురంతా నువ్వు దోచుకెళ్ళావుగా..

10549. నేనో ద్వీపకల్పం..
సేద తీర్చే భాగ్యం నాదవ్వాలిప్పుడు..

10550. జ్ఞాపకాలని ఏమార్చాలిక..
జీవితం చిగురించాలనుకుంటే..

10551. పరిమళమిలా సొంతమైంది..
ప్రణయం పూదోటై నాలో వెల్లివిరిసాక..

10552. జీవితానికి సరిపడా జ్ఞాపకాలు..
కొన్నిక్షణాల మెరుపులుగా నాలో..

10553. జ్ఞాపకాలే ఓదార్పులు..
నాలో నిరాశని పారద్రోలే పలకరింపులు..

10554. అనుభూతుల పెన్నిధి నేనేగా..
నా జ్ఞాపకాలతోనే నువ్వుంటే..

10555. అక్షరాలతో సహజీవనమందుకే..
అనుభూతులనే అభిరుచిగా నీకు పంచాలని..

10556. ముగిసిన దాగుడుమూతలు..
కలలో మెలకువవగానే..

10557. అక్షరాలపై అలుగుతుంటారెందుకో ఆ నలుగురూ...
భావుకత వాసన మనసుకి నచ్చలేదంటూ..

10558. నవ్వుతూనే నేనున్నా..
సగంలో ఆపిన ప్రేమలేఖను ముగిస్తావని..

10559. రాయాల్సిందే కలలన్నింటినీ..
ఒక్క వాక్యంలోనైనా నిన్ను తడుముకుంటావని..

10560. నేనో వలపు పిపాసినే..
నీ హృదయసౌధానికి పునాదినవ్వాలని..

10561. ఏకాకిలా నేను మిగిలిపోయా..
నువ్వూ ప్రేమా దూరమైనందుకేమో..

10562. ఎప్పుడు సరితూగుతాయో భావాలు..
ఎన్ని పేర్చినా నీకర్ధమవలేదంటే..

10563. భావాలు శృతి మించాయనుకోకు..
అభిమానాం హద్దుమీరి నిన్నలరించినప్పుడు..

10564. కొన్ని బంధాలంతేలే..
గుండె బరువుని తెలీకుండానే పెంచేస్తుంటాయి..

10565. ప్రేమకందుకే దూరమైనట్టున్నా..
నీలో నన్ను వెతుక్కోడంలో విఫలమయ్యి..

10566. మౌనం నచ్చట్లేదిప్పుడు..
మనసుకి నీ ముచ్చట్లు మక్కువయ్యాయనే..

10567. మనిద్దరిదీ ఒక లోకమైనందుకే..
వేరెవ్వరినీ చేరనివ్వలేదు మనసులోనికి..

10568. వాన వెలియడం గమనించనే లేదు..
వానవిల్లుని చూడాలనే నా ఆనందంలో..

10569. సముద్రంతో సంధిచేసుకోకు..
ఆకాశమై నీకు నేను చేయూతనిస్తుంటే..

10570. నా పలుకులు గవ్వలైనందుకేమో..
నీ గుండెల్లో పదిలమైనవిలా..

10571. జీవితాన్ని జయించలేకున్నా..
నిట్టూర్చినప్పుడల్లా నలిగిపోతూ..

10572. గతాన్ని బూడిద చేయాలందుకే..
భవిష్యత్తు అందంగా పేర్చుకోవాలంటే..

10573. గాయమైనా ఫరవాలేదనుకున్నా..
గేయమై నన్ను అలరించేందుకు నువ్వున్నావని..

10574. ప్రణయానికి పరిధిలేదందుకే..
అనంతమై విస్తరించినందుకే..

10575. మనోరథం ముచ్చటపడుతోంది..
మన మనోవేగాలింత త్వరగా చేరువయ్యాయని..

10576. కన్నీరు కెరటమైనప్పుడే అనుకున్నా..
నీ హృదయతీరాన్నొచ్చి తాకుతుందని.. 

10577.  ఈ నిరీక్షణెప్పటికీ ముగియదేమో..
ఋతువులన్నీ కనికరంలేక కదిలిపోతున్నా..

10578. జ్ఞాపకాల గలగలలు కాబోలు..
నువ్వెక్కడున్నా తలపులకి లోటుండదంటూ..

10579. నా ఊహల్లోకి నిన్ను ఆహ్వానిస్తున్నా..
కలిసుంటే మన ప్రపంచం సుందరమవుతుందని..

10580. నేనొంటరినని తెలుసుకున్నా..
నా విషాదంలో ఎవ్వరూ తోడవ్వలేదనే..

10581. ఆసరా కోసం ఎదురుచూడకలా..
నీలో ఆత్మస్థైర్యం నిండుకొనేలా..

10582. వెలుగులీనుతోంది మనసు..
ఎదురుచూసిన నీ కావ్యంలో నెలవంకనయ్యానని..

10583. ఉరకలేసే నదికి సమానమే నేనెప్పుడూ..
ఉప్పొంగే సముద్రమై నువ్వు రమ్మన్నప్పుడల్లా..

10584. సరిహద్దు దాటి ఎగరాలనుకున్నా..
మబ్బేసిన ఆకాశమిలా భయపెడుతుందనుకోలా..

10585. నిన్నట్లో నిలబడిపోయా..
భవిష్యత్తు ఆగమ్యమైనందుకే..

10586. ఇంగితమివ్వని చదువు..
ప్రేమపాఠాలను మాత్రమే నేర్చుకొమ్మని ప్రేరేపిస్తూ..

10587. మనసు మిఠాయయ్యింది..
చెరుకు తీపిలాంటి నిన్ను దాచుకోగానే..

10588. నిన్న నీతో నేనున్న నిముషాలే..
నేడు ఒంటరిగా మిగిల్చిన విరహాలు..

10589. తీరని మోహానివే..
తపనలు వేధిస్తున్నా..

10590. మునుపులేని మోహ సూచన..
నువ్వెదురైన హాయి వాన..

10591. ఉషస్సు దూరమయ్యిందెప్పుడో..
మనసులో చీకటవ్వగానే..

10592. హరివిల్లునై నే రాలేనా..
వానాకాలమని నువ్వు భయపడుతున్నా..

10593. కొన్ని క్షణాలనలా దాచేసుకున్నా..
మాట్లాడిన మౌనాలు అపురూపాలనే..

10594. కొన్ని క్షణాలను దిద్దుకోవలసిందే..
అదేపనిగా విషాదాన్ని స్రవిస్తున్నాయంటే..

10595. వాన కురవడం గమనించనే లేదు..
అప్పటికే తడిచి ఉన్నందుకేమో నేను..

10596. వానంటే విసుగొచ్చిందందుకే..
కన్నీరాపని కళ్ళతో తను సమానమయ్యిందని..

10597. కల్లాపి చల్లుకోవాలేమో మనసంతా..
నీ తలపులొచ్చి పరిమళించాలనుకుంటే..

10598. నాలోని విషాదం నిజమే..
చిరునవ్వుతో కప్పేస్తున్నా నీకగుపడొద్దని..

10599. బడిగంటలు వినబడాలిప్పుడు..
ఉన్నట్టుండి బాల్యంలోని మనసు పరుగెత్తాలంటే..

10600. ఆకాశమే విస్తుపోవాలిప్పుడు..
విదిలించకుండానే మబ్బుల్లో నీరెందుకు జారిందోనని..

10401 - 10500

10401. ఊహించని మలుపేగా..

గ్రీష్మంలో వసంతజలం నాపై చల్లావంటే..

10402. మనసు పులకరిస్తోంది..
ఒక చిరుస్పర్శ అనుభవానికిలా చేరువయ్యిందని..

10403. ఎదురుచూపులు ముగిసేట్టున్నాయి..
మనసులో పండగ సందడి మొదలైనందుకు..

10404. ఆనందంతోనే కొలుచుకుంటున్నా..
మదిలో నిన్ను దాచుకున్న అనుభూతిని..

10405. కన్నీరెప్పుడూ ఓడిపోతుంది..
గుండెలోంచీ జారొద్దని ప్రయత్నించిన ప్రతిసారీ..

10406. ఓదార్చలేకున్నా హృదయాన్ని..
ఓ బంధం దూరమైన ఆవేదనలో..

10407. ఎన్ని చినుకులని ముడేసుకోవాలో..
కొంత పరవశాన్ని కాజేద్దామంటే..

10408. ఉండీ లేనట్టుంటావు..
నా ఊపిరికడ్డం పడుతూ నువ్వు..

10409.సంధ్యారాగం మర్చిపోలేనుగా..
నీ జ్ఞాపకం కన్నుల్లో ఎర్రనవుతుంటే..

10410. మౌనాన్ని ఆలకిస్తున్న క్షణమిది..
నిశ్శబ్దం మాట్లాడుతున్న సవ్వడిలో..

10411. ప్రతిమలుపులోనూ నువ్వేగా..
కాలాన్ని ఆపేస్తూ కలసిరాలేదని నిందలెందుకో..

10412. తీరేదేలే తనివి..
తీరికయ్యే రోజుకని మనసు ఎదురుచూస్తుంటే..

10413. మూగబోయిన మాటలనడుగు..
మనసు మైదానంలో ఆ నిశ్శబ్దమేమిటని..

10414. పుంతలు తొక్కుతున్న నాలో పులకరింతలు..
నీ ధ్యాసలో వివశమై నేనుంటుంటే..

10415. వసంతం కోల్పోయినట్టుంది..
నా చూపుకొనల్లో నువ్వు కన్నీరయ్యావంటే..

10416. చినుకై కురవలేనా..
నాకై దోసిళ్ళు నువ్వు తెరిచుంచావంటే..

10417. కల పూర్తయ్యింది..
ప్రాణమస్తమించినా ఫరవాలనిపించేలా..

10418. ప్రేమను కొలుస్తున్నాను..
మనసు బయటపెట్టాలో లేదో నిర్ణయించాలని..

10419. నా ఒంటరితనపు హద్దు చెరిగిందిలా..
నీ నీడతో జత కలిసినందుకు..

10420. అనుభూతి ప్రవహించినప్పుడే అనుకున్నా..
వానల్లే కురిసింది నువ్వేనని..

10421. కాలమలా ఒదిగినట్టుంది..
నీ జ్ఞాపకాల శిలలు చెక్కుతున్నందుకే..

10422. కవితయ్యింది నువ్వేగా..
కలలోకి పిలవలేదని పదేపదే అలుగుతావెందుకో..

10423. అనుబంధపు వల్లరికి తొందరెంతుందో..
అనురాగపు సరిహద్దు ఆకాశమవుతుంది..

10424. నీ తలపులే అమృతంగమయం..
జీవించి ఉన్నానందుకే స్వర్గమయం..

10425. నీ జ్ఞాపకాల పందిరిలో నేనున్నా..
వానొచ్చిందని మన ప్రేమపాటని వల్లిస్తున్నా..

10426. మిణుగురుల్లోనేం వెతుకుతున్నావో..
నీలిమేఘపు నక్షత్రాల నడుమ నేనుంటే.. 

10427. అక్షరాలకు స్వరమొచ్చినట్టుంది..
నీ కవితల్లో సంగీతం వినబడుతుంటే..

10428. నన్ను తాకిన రంగుల సీతాకోకేనది..
గుండె గుచ్చుకున్న నీ జ్ఞాపకం..

10429. అరణ్యమంతా చీకటయ్యింది..
వెన్నెల పలకరించనని వలసటు పోయినందుకే..

10430. నవ్వుని పారేసుకున్నా..
నువ్వు పలకరిస్తావని ఎదురుచూసి అలసినందుకే..

10431. కువకువలు కప్పుకోవాలనుంది..
కమ్మని మాటలాడవూ..

10432. అవ్యక్తమొకటి వినబడుతుంది..
అంతులేని నీ తలపు మేల్కొన్నట్టుంది..

10433. ఏకాంతాన్ని సవరిస్తున్నా..
మౌనాన్ని పాడుకుందామని..

10434. అంబరమాపలేని హర్షమనుకుంటా..
వర్షమై కురిసి మనల్నిలా తడిపేస్తుంది..

10435. నేనే ఆమనైపోతున్నా..
నువ్వంత నాజూకుగా నన్ను వర్ణిస్తుంటే..

10436. చివరికి మిగిలిందిదే..
మనసు విరిగిన మెత్తని సవ్వడి..

10437. అలలవుతున్న కురులు..
దోబూచులాడేందుకు నీ మోము దాచుకున్నావని..

10438. తపిస్తూనే తనుంది..
నీ హృదయమనుకుంటా..

10439. అనుభవానికొస్తుందిప్పుడే..
నీ ఊపిరి నాలో చప్పుడైన సంగతి..

10440. నిన్నటికి అనామికనే..
నీ ప్రేమే నా పేరయ్యిందిప్పుడు..

10441. అద్భుతానికే అపురూపమవుతున్నా..
నీ పరవశాలు అణువణువులో సోకి..

10442. మనసిస్తే చాలు..
మాలికైపోనా నేను..

10443. నీకోసమే వికసిస్తున్నా..
కలువకు దూరమున్న చంద్రునిలా ఆరాధిస్తావని..

10444. కలతై కమ్ముకోకు..
కథగా మలుచుకోలేను..

10445. నిజాలన్నీ నిష్ఠూరాలే..
ఆత్మీయత ముసుగుమాటు తొంగి చూడరాదంతే..

10446. రేపటి వాస్తవమే..
ఈరోజు కలగా నన్ను మురిపించింది..

10447. కలయిక కోసమని ఎదురుచూపులెందుకో..
మధురోహలన్నిటా నన్ను పొదుపుకుంటున్నా..

10448. మాటతో ముడిపడే బంధాలే అన్నీ..
పెదవికి చేటయ్యే పదాలు వాడొద్దందుకే..

10449. పొగడపూల పరిమళమబ్బినట్టుంది..
నీ పొగడ్తలోని నిజాయితీ గమనించగానే..

10450. అధైర్యం ముందుకొస్తుంది..
ధైర్యాన్నెంత వీరభినయించాలనుకున్నా..

10451. నెలవంకకి దూరం జరిగిపోయా..
చుక్కలతో వైరం పెంచుకోడమెందుకనే..

10452. జ్ఞాపకాన్ని జావళి చేసి పాడుకోవాలిక..
ఆకాశం నా అస్తిత్వానికి తోడైనందుకైనా..

10453. నిశ్వాసగా వదిలేస్తావని భయపడుతున్నా..
నీ ఊపిరి కాలేకపోయినప్పుడల్లా..

10454. నేనో విషాదాన్ని..
చెదిరిపోయిన కలలన్నిటా నీకు కనిపిస్తున్నానందుకే..

10455. విశ్వాసమొచ్చిందిప్పుడే..
నీ ఆకాంక్షలోని ఆనందం నేనవగానే..

10456. కన్నీరే మిగిలిందిప్పుడు కన్నుల్లో..
అనవసరపు బంధాల్లో ఇరుక్కున్నందుకు..

10457. హృదయంలోకే చేరాలనుకున్నా..
నీ జీవితంలో వసంతాన్ని నింపాలని..

10458. నిన్నటిదాకా నిద్రించిన శిల్పాన్ని..
నీ స్పర్శతో వేకువయ్యిందిప్పుడే..

10459. నిశ్శబ్దపు మధురథ్వనే అది..
నాలో సంగీతమై ప్రవహిస్తుంది..

10460. అపురూపమే ఈ శ్రావణం..
స్వరాలవెల్లువలా నీ స్నేహం..

10461. మనసులో దాచుకున్నా..
వేకువపిట్టల చిలిపిసవ్వడి నాలో నిండిపోతుంటే..

10462. మధూదయం నిజమే..
నీ తలపులతో వేకువ మొదలైనప్పుడు..

10463. ఆనందం మనదే..
ఎదురుచూపులు ఫలించి కన్నీటిభాష్పాలు విడుదలైనప్పుడు..

10464. మనోహరమనిపించింది ఉదయం..
గులాబీరేకంటి నీ తలపు మెత్తదనముతో..

10465. పువ్వై నవ్విన వసంతం..
ఎంత బరువెక్కిందో విరహం..

10466. స్వప్నాలెరుగని కన్నులవి..
ప్రతినిత్యం కన్నీటితో అనిద్రే అవుతుంటే..

10467. కాలం కాగితమయ్యింది..
మరపురాని గతమంతా తనలో దాచుకున్నందుకు..

10468. నా మనసులో మొదలైన వసంతం..
కోకిల తెలిపింది నీ ఆగమనం..

10467.  నమ్మకాన్ని వెతుక్కోవాల్సిందే..
ఆశనిటు పూయించి నడకటు మార్చుకుంటే..

10468. వసంతానికి సమానమైన శిశిరం..
హృదయస్పందనులు ఒకటైన మనమిద్దరం..

10469. వేదనదులంతే..
నిరంతరంగా ప్రవహిస్తూనే ఉంటాయి జీవనదులైనట్టు..

10470. కొన్ని మురిపాలంతే..
రవ్వంత పరిచయంలోనే ఆనందాలు పెనవేసుకుంటాయి..

10471. అల్లాడినప్పుడే అనుకున్నా..
నీలో మోహం తరంగమై ఎగిసుంటుందని..

10472. వలపించావనుకున్నా..
నీ ఎదలో చాపేసుకునందుకే కూర్చున్నా..

10473. బంధీనే మనసు..
తాపత్రయాల నుండీ తప్పించుకోలేక సతమతమవుతూ..

10474. ప్రేమని గుర్తించిందప్పుడే..
నీకు దూరమై విరహం అనుభవానికొచ్చినప్పుడే..

10475. మట్టివాసన పలకరింపు..
వర్షాన్ని మోహించినందుకేమో..

10476. ఆ నవ్వులో నలుపురంగు..
ఏ జ్ఞాపకాలు స్రవిస్తున్నందుకో..

10477. మతి చెదిరినట్టుంది..
నిన్ను తలచినప్పుడల్లా ఆవేదన అధికమవుతుంటే..

10478. మూగబోయిన అక్షరానికి భావాలెన్నో..
మనసైన రాగానికి అనుభూతులన్ని..

10479. సప్తస్వరాల సమ్మేళనమేగా..
మన పరిచయానికి అక్షర రూపమిస్తే..

10480. కోరికలుంటే అంతేగా..
మనసుని భావాలకందనివ్వక అదోలా ఏడిపిస్తుంది..

10481. మాటల్ని సమాధి చేసిన విషాదం..
నీకు దూరమైన నా వర్తమానం..

10482. నిశ్శబ్ద క్షణాలే ముందున్నవన్నీ..
స్వరాలు మరచిన జీవితమయ్యిందిగా..

10483. కలిసుండటమో విశేషం..
కానీ అది జరిగేది కథల్లోనే..

10484. సంతోషం స్వర్గీయమైందెప్పుడో..
కుటుంబం కాస్తా విచ్ఛినమై ఛిన్నాభిన్నమైనప్పుడే..

10485. కలిసుండాలన్న కోరికే..
ఈనాటికిలా మనసుకు పండుగైనట్టు తీరింది..

10486. కలిసున్నదెప్పుడు స్థిమితంగా..
నీకు నేను కేవలం అవసరాన్నయ్యాక..

10487. నమ్మకమెందుకు విశ్రాంతి కోరిందో మరి..
మనసుని పదేపదే అనుమానంలోకి జార్చుతూ..

10488. మనసుని సవరించిన నీ కొంటెదనమిది..
నాలో అనురక్తి బుగ్గల్లో కెంపులుగా..

10489. నా నువ్వుగా మారినందుకేమో..
నీలో నవ్వులు మల్లెలవుతున్నాయి..

10490. మనసిప్పుడు సీతాకోకే..
నీ మౌనంలోని పలకరింపులు ఆలకించి..

10491. నిర్లక్ష్యమదే మరి..
నువ్వుండగా నీరవం నా నేస్తమయ్యిందంటే..

10492. ఈ రోజు అమాసని మర్చేపోయా..
దీపావళి వచ్చిందని నువ్వు గుర్తుచేసేవరకూ..

10493. మనసెప్పుడో శూన్యమైంది..
కాస్తంత వివేకమూ అప్పనంగా తనకివ్వగానే..

10494. వర్తమానం శయనించినట్టుంది..
గతమందుకే కలలా పదేపదే సవ్వడిస్తుంది..

10495. ఆనందం అధికమైందిప్పుడు..
నువ్వల్లిన పదాల్లో అనుభూతినై నేనున్నందుకు..

10496. హృదయన్నెందుకు మెలిపెడతావో..
అనుభూతి నీకే పూర్తి స్వంతమైనట్టు..

10497. హరివిల్లు గొడవకొస్తుంది..
నవ్వమన్నప్పుడల్లా తనకు నేను పోటీనిస్తున్నానని..

10498. నాలో చిరునవ్వు పరవళ్ళు తొక్కుతోంది..
నీలో నీరవాన్ని పూర్తిగా హరించాలనే..

10499. అటూ ఇటూ నీ తలపులు..
నా హృదయానికి పదివేల పలకరింపులవే..

10500. పయనాన్ని ఆస్వాదించవలసిందే..
జీవితంలో గమ్యమెంత సుదూరమని అనిపించినా..

10301 - 10400

10301. సడిచేయనంటున్న భావాలు..

నీ జ్ఞాపకాలను మౌనంగా స్మరించుకుంటూ..

10302. నీలో నాలో జీవితావేశమిప్పుడు..

కలలో మనం విడిపోయినందుకేమో..

10303. ఆప్తమై కలిసిపోలేనా..

నీ పెదవంచు ప్రేమగా పాడుతానంటే..

10304. మనసు మరుగుజ్జయిందట..

మమత పంచేందుకు ముమ్మార్లు ఆలోచిస్తూ..

10305. చూపు మరల్చలేకున్నా..

నువ్వలా హరివిల్లుని నడుములో దాచేస్తుంటే..

10306. కలవని చేతులు..

చప్పట్లు ముగిసినందుకేమో..

10307. ప్రేమ ప్రభావమటువంటిది..

 అర్హత లేనివాళ్ళనూ తడిమి ఆదరిస్తుంటుంది..

10308. నవ్వి చానాళ్ళయింది..

జ్ఞాపకాల వ్యసనంలో నేను తప్పిపోయినందుకేమో..

10309. మాటలందుకే తగ్గించేసా..

నా మౌనాన్నయినా సరిగా అర్ధంచేసుకుంటావని..

10310. కొన్ని నవ్వులిక్కడ నిషేదాలు..

విషాదాన్నే పాడగలిగే పెదవుల్లో..

10311. ఆగేలా లేదస్సలీ వాన..
నా కన్నీటిని దాచేస్తానంటూ..

10312. ఆఖరి చరణంగానైనా నేనుంటా..
నీ పాటలో నన్నుంచుతానంటే..

10313. ఏకాంతం కావాలట ఆకాశానికి..
శూన్యంలోకి జారినట్టుందందుకే మరి..

10314. అబ్బురాలజోలికేమీ వెళ్ళబోకు..
ప్రేమంటే నీదేనని ఒప్పుకున్నా నేనెప్పుడో..

10315. గమకాలతో కవ్వించకలా..
తమకాలు రేపినట్టు ఈ వేళలోనా..

10316. క్షణాలు లెక్కిస్తావెందుకో..
కలలో ప్రతినిత్యం నిన్నే పలకరిస్తుంటే..

10317. మనసప్పగించి చూస్తున్నా..
నాకై తపించిపోతున్న నీ గుండెను..

10318. మెలకువొచ్చిందిన్నాళ్ళకి..
నీ ప్రేమకవితలో కలగన్నది నన్నేనని..

10319. రవళించాలనే ఉంది ప్రతిసారీ..
వసంతమై రమ్మని పిలిచినప్పుడల్లా..

10320. రాతిరి వలసపోయిన కలలే..
పగలు ఊహలై నన్నల్లుకుంటూ..

10321. ఒకప్పుడు పుస్తకమో అలంకారం..
నేడు అంతర్జాలమో వ్యసనం..

10322. గంథమద్దుకొని నీవైపొస్తున్నా..
నీలో కిలికించితాలు చెవులారా విందామనే..

10323. ప్రేమెప్పుడూ అపురూపమే..
ప్రాణమిచ్చి ఛస్తేనే అనుభవమవుతుంది కొందరికి..

10324. మనసున మనసవ్వాలనుంది..
మన పరిచయాన్ని కొత్తగా మొదలెట్టవూ..

10325. ఊపిరిలో ఒక నిశ్శబ్దం..
నా ఒంటరితనానికి సంకేతం..

10326. తన స్మృతులు లోలకాలు..
ఊగినప్పుడల్లా నన్నూపుతూ కలవరపెడతాయి..

10327. కమనీయరాగాలను ఆలకిస్తున్నా..
నువ్వే సముద్రమై నాకు స్పూర్తినిస్తుంటే..

10328. వెచ్చగా పొదుపుకుంటున్నాను..
నీకు నేను అపురూపమైన తొలిచూపులను..

10329. కాసేపన్నా ఉండవెందుకో..
మాటివ్వాల్సొస్తుందేమో మరి.

10330. మౌనం చాలుగా మన మధ్య..
ఏకాంతంలో అంతరంగపు మాటలు మొదలయ్యాక..

10331. వదిలేసుకోలేనా నన్ను నీకు..
నాలోని పరిమళాన్ని నువ్వాస్వాదిస్తానంటే..

10332. ఏ విషాదం వెంటబడుతుందో..
కలల్లో సంచరిస్తూ నువ్విప్పుడు..

10333. అప్పుడప్పుడూ పొడుస్తుంటాయి..
కొన్ని స్మృతుల గులాబీలకు ముళ్ళుంటాయి..

10334. మనసు నిండింది..
నా నిరీక్షణలో నీవనుభవించిన తపనకి..

10335. కనుమబ్బుల్లో పూసిన ఇంద్రధనసులు..
మనసెప్పుడు స్పందించిందో గమనించనేలేదు..

10336. మనసు కంపిస్తోంది..
తను అదృశ్యమవుతాడన్న ఒక్క భావనకే..

10337. పరిచయాలన్నీ సందేహాలు..
విశేషమో..సశేషమో తేలని గందరగోళంలో..

10338. కరుగుతూనే కాలం..
నువ్వు దూరమైన క్షణాలు ఘనీభవించాయంతే..

10339. మధనపడుతూనే ఉన్నా లోలోన..
ఊపిరాగిపోతుంటే నువు కనుమరుగైనప్పుడు..

10340. ప్రేమందుకే గెలిచింది..
నీ తలపుల్లోని వెన్నెల కావ్యాలకి..

10341. మరుగునపడ్డ జ్ఞాపకాలు..
వాస్తవంలో జీవించడం మొదలెట్టినప్పటి నుంచి...

10342. నాలో పరిమళాలిప్పుడు..
మధురభావనగా నీ గుండెకు కట్టేసుకున్నావంటే..

10343. గుండెపై దండలా నేనవనా..
ఒక్కసారి మనసయ్యిందంటే చాలుగా..

10344. ఆదమరుపు కావాలంది మనసిప్పుడు..

నీ తలపును ఆహ్వానించానందుకే..

10345. విరహమెక్కువే నా మనసుకి..
నీ జ్ఞాపకాలనందుకే వదలనంటోంది....

10346. కొన్ని తలపులంతే..
ధూపమేసి మనసుకి ఆహ్లాదాన్ని పంచుతాయి..

10347. సాయింత్రం గుభాళిస్తుంది..
నీ చిరునవ్వులో గులాబీగా నన్నద్దుకుంటే..

10348. ఆకాశం నేనే..
పందిరిగా నన్ను కప్పుకుంటున్నావుగా జీవితమంతా..

10349. కధలెప్పటికీ పాతబడవు..
మన అనురాగాన్ని రోజుకో శృతిలో కలిపి రాస్తున్నందుకు..

10350. వ్యక్తిత్వాన్ని అనుమానించాల్సొస్తుంది..
కొన్ని నిజాలు నెమ్మదిగా తెలుస్తుంటే..

10351. నన్నారాతీయడంలోనే ఉంటావెప్పుడూ..
పగటికలలన్నిట్లో నాతో యుగళాలు పంచుకుంటూనే..

10352. నిశ్వాసగా కదిలిందిలి నిట్టూర్పేలే..
శ్వాసగా చేర్చేసుకుంటాగా నిన్నింకోసారి..

10353. మనసెందుకు ముక్కలవుతుందో..
మనుషుల స్వభావాన్ని అతిగా ఊహించినందుకేమో..

10354. వలపును పంచుతూ నీ తలపులు..
నాలో ఎల్లప్పుడూ చిరునవ్వులు పూయిస్తూ..

10355. జీవితంపై ప్రేమయ్యిందిప్పుడే..

జన్మలెన్నో దాటి నిన్ను నాతో జత కలిపిందని..

10356. నీ తలపుల్లోనే ఆదమరచిపోతున్నా..
మెలకువొస్తే వాస్తవం భయపెడుతుందని..

10357. నన్ను నేను మరచిపోగలుగుతా..

చిన్నారుల చిరునవ్వుల్లో తప్పిపోయినప్పుడే..

10358. అద్దానికి అవకాశమిచ్చినందుకేమో..
అందాన్ని అదేపనిగా కెలికి చూపిస్తుంది..

10359. ఉండీ లేనట్టు నువ్వు..
మనసులో అడుగెందుకేసావో తెలీక..

10360. వెన్నెలను ముసుగేసుకున్నా..
సహజమైన పున్నమిని ప్రేమిస్తున్నావని తెలిసి..

10361.కలల్ని పూరించుకుంటున్నా..
నీ వలపు రేయంతా తలపవుతుంటే..

10361. అలుసయ్యింది మనసెప్పుడో..
బ్రతికుండగానే నన్ను జ్ఞాపకంలో కలిపేసావందుకే..

10362. నిన్నారాధిస్తున్న కన్ను నాది..
ప్రేమందుకే కలంలో ప్రవహిస్తుంది..

10363. జ్ఞాపకమొకటే మిగిలుంది..
వసంతాన్ని అన్వేషిస్తూ నువ్వు ఎగిరిపోగానే..

10364. వయసవుతూనే ఉంటుంది..
జీవితమనే ఆటని గెలవమని సందేశమందిస్తూ..

10365. నిరాశను శ్వాసించినందుకేమో..
ఆశ నిశ్వాసగా జారుకుంది చెప్పకుండగా..

10366. మనసు దాకా చేరావనుకోలా..
ఎదలోని తీయదనం తడుముకోనంతవరకూ..

10367. ఏకాకినని అనుకుంటారందరు..
నీ తలపుల సహజీవనమో రహస్యం..

10368. దోబూచులాడక తప్పట్లేదు..
నా కన్నులు చదివేస్తావని భయమవుతుంటే..

10369. ఏదో తపన..
నా కోసం నువ్వెదురు చూస్తుండాలని..

10370. మనసంతా మబ్బులు..
నువ్వు నింపిన శూన్యమేగా అది..

10371. సుతారాలు మీటిపోకలా..
హృదయమిక్కడ సొమ్మసిల్లేలా..

10372. క్షణాలకదెంత కంగారో..
కాలాన్ని లెక్కించేలోపు పాదరసంలా కదిలిపోతుంది..

10373. నన్ను కాదని నిన్ను చేరింది మనసు..
ఏ మత్తు చల్లావో ఇప్పటికీ తెలియకుంది..

10374. అపార్ధం ఎదిగిపోతుంది..
ఆత్మీయత మరచి అసూయలు చేరువవుతుంటే.. 

10375. మాటలతో వేస్తావెందుకో వల..
మనసిప్పి తెంచుకోక సంకెల..

10376. చిరునవ్వొక్కటి చాలు..
ఇంద్రధనస్సు జీవితంలో ప్రతిరోజూ పూస్తుందంతే. 

10377. ఎన్ని కలతలనోర్చుకోవాలో..
కంటికి నీరు అలుసవుతోందని అణుచుకున్నా..

10378. కధలెన్నో వింటున్నా..

నీ కన్నుల్లోకి తొంగిచూసిన ప్రతిసారీ..

10379. మనసుపడ్డప్పుడే తెలిసింది..
మన పరిచయం ఈనాటిది కాదని..

10380. బంధమేసావుగా ఎన్నడో..
గుండెల్లోంచీ తోసేస్తావెందుకో ఇప్పుడిలా దయలేనట్టు..

10381. గుట్టుగుందామన్నది నువ్వేగా..
రట్టవలేదంటూ రాలుగాయి రాగాలు మొదలెట్టావెందుకో..

10382. నిన్న నువ్వు మెచ్చినవే..
అనుభూతులు రాగాలైన తమకాలు..

10383. చీకటితో గొడవపడుతున్నా..
కలలు రాకుండా మనసులో చేరిందని..

10384. నిశ్శబ్దమలా కరిగింది..
కాస్త కన్నీటితో మనసు కడిగేసినందుకు..

10385. స్నేహసౌరభానికెంత మత్తుందో..
ఎన్ని దశాబ్దాలైనా వీడని గమ్మత్తవుతుంది..

10386. శూన్యంలో నేను..

నిండుకున్న మనసులో జ్ఞాపకాలు వెతకలేక..

10387. తెరలు తెరలుగా ఆవేదన..
హృదయాన్ని కదిలించిన జ్ఞాపకమేనది..

10388. కల్పించుకున్న వ్యాపకమొకటి..
నీ తలపుల్లో పులకరిస్తున్న మనసుదది..

10389. జ్ఞాపకాలన్నీ జాజులైనట్టేగా..
ఈనాటికీ చెలిమి పరిమళం వాడిపోలేదంటే..

10390. విషాదమందుకే పండుతోంది..
ప్రేమలో కన్నీరు కలిసి మనసుకంటినందుకు..

10391. క్షణాలకు తప్పలేదు..
వియోగాన్ని వెచ్చని స్పర్శగా నిమురుకోవడం..

10392. ఎంత వెతికానో స్వప్నాల్లో..
తీపిచెమ్మయిన నీ జ్ఞాపకాలను..

10393. ఎన్ని జన్మల తాపత్రయముంటేనేమి..
ఈనాటికీ నిన్ను అందుకోలేకపోయాక..

10394. నాకిది వసంతకాలమే..
నీ కౌగిలిలో కొత్తగా పుట్టానంటే..

10395. వ్యధలన్నీ మనసువే..
నవ్వులెందుకు మాయమవుతాయో పెదవులపై విచిత్రంగా.. 

10396. నిద్దురతో పనేముందంటోంది రాతిరి..
నిన్నూహిస్తూ మైమురుస్తున్న కారణానికి..

10397. శాశ్వతమే మది పరిమళాలు..
నీ తలపునంటిన ఉదయాస్తమానాలు..

10398. మెలకువొచ్చింది మనసుకి..
నీ మౌనంలో ఏ రాగమిన్నదో..

10399. పిలుపు నీదయినందుకేమో..
మనసు గతాన్ని మలుపులో విడిచేసింది..

10400. జీవితమప్పుడే పూర్తవనట్టే కదా..
ఒక్క మలుపైనా తిరగలేదంటే..