ద్విపదాలు : 2551 నుండి 2600 వరకు

..................................... ********.....................................

2551. నెలరాజుదే ఆనందం...
దిగులుపడ్డ తారను వాటేసి ఓదార్చొచ్చని..
2552. మేఘాలు దాక్కోవడమేమిటో..
నీ నవ్వుకు రెక్కలొచ్చి ఆకాశమేగితే..
2553. నీ దిగులు వెన్నెలవడం తెలుస్తోంది..
తన తలపుకే పులకాంకురాలు మొలకెత్తుతుంటే.
2554. ఉపశమించని దిగులు..
మంచిముత్యాలనే చల్లగా ఎదపై అలంకరించినా..
2555. ఒత్తులు పెట్టడం మరిచావు అక్షరాలకి..
నీ ప్రేమను అపార్ధం చేసుకున్నానందుకే..
2556. దిగులెప్పుడూ నావైపే మొగ్గుతోంది..
సంతోషాన్ని నీపెదవులపై చేర్చేస్తూ..
2557. నువ్వు కలం పట్టిన మొదటిరోజే అనుకున్నా..
కాళిదాసునో శ్రీనాధుడ్నో అనుకరించే ఆలోచన చేయవని..
2558. దిగులుకీ శిశిరానికీ తేడా ఏముందిలే..
హృదయం పగిలినా ఎండినా బీటలేగా..
2559. అంటించినా ఆనందమేగా నీకు..
జ్ఞాపకం బూడిదై పరిమళించిందని..
2560. నీ భాషలోని సౌందర్యాన్ని వెతుకుతున్నా..
తెలిసిందే అయినా కొత్తకోణంలో ఆవిష్కరిస్తావనే..
2561. మనసపురూపమని తెలీనందుకేమో..
ఆరాధన వ్యర్ధమవుతుంది కొందరి జీవితాలలో..
2562. ఎన్ని అక్షరాలు వెతుకుతావో..
సౌందర్యపిపాసలో భాషలన్నీ నేర్చేస్తూ..
2563. అక్షరశిల్పాలెన్ని చెక్కావో..
ఉలి చేతపట్టకనే అద్భుత శిల్పివనిపించుకుంటూ..
2564. వెన్నెలెంత కరిగిపోయిందో..
మన చెలిమిలోని మాధుర్యానికి వెచ్చబడి..
2565. చల్లబడే విరహం కాదేమో చంద్రికది..
ఎంత పన్నీటిగంధాలు లేపనాలుగా పూసుకున్నా..
2566. కైదండలకై ఎదురుచూస్తున్న చంద్రిక..
కరాలఅల్లికలో సాంత్వన పొందాలని..
2567. మనసుతో మొక్కాల్సిందే మామను..
అనుభూతిని మహత్తరం చేసినందుకు..
2568. రెప్పల్లో దాచేసా రహస్యాలు కొన్ని..
కన్నుల చీకట్లలో సమాధి కావాలనే..
2569. నా నవ్వులసవ్వడెంత మెత్తనో..
నిశ్శబ్దానికీ సున్నితమైన భావమిస్తూ..
2570. నవ్వులు ఆకాశానికేగాయి..
నక్షత్రమాలగా మారి నిన్నలరించాలనే ఆకాంక్షలో..
2571. నవ్వులనపురూపం చేసేసా..
నీ అనురాగానికి మాత్రమే కానుకివ్వాలని..
2572. భాద్రపదమని మరచినట్లున్నావు..
పుష్యాన్ని ముగ్గుల్లో పూయించాలనే తొందరలో..
2573. క్షణాలను లెక్కిస్తున్నా..
నీ విరహంలో నత్తనడకలు మొదలెట్టాయని..
2574. రెప్పలను యవనిక చేసానందుకే..
మధురానుభూతులను కన్నుల్లోనైనా దాచుంచాలనే..
2575. ఏడుస్తున్నాను..
తిట్టావని కాదులే..ఆవిడ ముందు చిన్నబుచ్చావని..
2576. ధ్వంసమవుతున్న వాంఛలు..
అగాధమైన సాగరగర్భంలోకి మనసు చేరినందుకే..
2577. వెలుగుతున్న మోముపై మరకలను వెతుకడమే పని..
రహస్యంగా నీ శక్తిని ఆర్పేయాలనే ఆలోచనలో..
2578. మృత్యుసవాలునే ఎదిరించేస్తా..
ప్రతిజన్మలో కౌగిలిని శాశ్వతం చేస్తానంటే..
2579. పగటి పొలిమేర దాటిన నాగరికత..
రాతిరి రంగులను రుద్దుకొనే ఆరాటంలో
2580.  అరమోడ్పులవుతూ నీ కళ్ళు..
సగంసగంగా నన్ను చూపిస్తూ..
2581. బీజాక్షరాలుగా మార్చేసుకున్నా..
నీ పెదాలు ఇష్టంగా పలికే ఆ పదాలు..
2582. నా అక్షరమెరుపులేననుకుంటా..
నీ కన్నుల్లో వెలుగుతున్న ఆనందాలు..
2583. అంతర్నిహితమైన ఆలోచనలెన్నో నాలో...
అక్షరాల్లో అలవోకగా చేరిపోతూ
2584. మనసు నిండుతోందిలే..
అరనవ్వులే నీ మనసు విప్పుతుంటే..
2585. ఆనందరసార్ణవం చేసా కన్నులను..
నిన్ను కలువగా కొలువుంచుకోవాలనే..
2586. మౌనవించానందుకే..
జ్ఞాపకాల వెన్నెలను ఏకాంతంలోనే ఆస్వాదించాలని.
2587. సందేహాలపుట్టే దేహం చివరికి..
సౌందర్యాలెన్ని పంచినా జీవితానికి..
2588. అక్షరలాస్యాన్ని ఆస్వాదిస్తున్నా..
నువ్వలా చెక్కిలిని పత్రంగా చేస్తుంటే..
2589. అణువణువూ నీ జ్ఞాపకాలు..
నిత్యాభిసారికగానే నన్నుండమని శపిస్తూ..
2590. ముత్యాలపాటల్లో కోయిలమ్మనే నేను..
ఒక్క నీ పలకరింపుకే..
2591. వలపువాన కురవడం గమనించలేదు..
తలపుల్లో నిలువెల్లా కూరుకుపోయినందుకేమో..
2592. వెన్నుముక విరిగిన రైతులు..
ఉరికొయ్యన నిటారుగా వ్రేళ్ళాడుతూ..
2593. అదో ఆనందపర్వం..
కన్నీటిని తెప్పించి మరీ తుడవడం..
2594. వెతకడం మానుకున్నా నిన్ను పలుచోట్ల..
కన్నుల్లో శాశ్వతంగా కొలువయ్యావని తెలిసాక..
2595. తగిలీతగలని పూలబాణాల్లా నీ చూపులు..
ఏడుమల్లెల నా తనువును అల్లాడించేస్తూ..
2596. జక్కువపిట్టనై వేసారిపోతున్నా..
రాతిరైతే విరహానికి తోడు కళ్ళుకనపడక..
2597. తమకమైన జాబిల్లినే నేను..
నీ గమకానికి స్పందించేవేళ..
2598.  అమలినమైన ఆత్మ..
అవకాశావాదాన్ని తనకు పులమొద్దని వేడుకుంటూ..
2599. అక్షరదాహమెన్నటికి తీరేనో..
రసవాహినిలో రేయింబవళ్ళు మనసు తేలియాడుతున్నా..
2600. అసూయను తరిమేస్తే సరిపోతుందేమో..
మనసులో ప్రేమకిరణాలొచ్చి వెలిగేందుకు..
..................................... ********.....................................