ద్విపదాలు : 3101 నుండి 3150 వరకు

..................................... ********.....................................
3101. నువ్వో అంతమవని రహస్యానివి..
పిపాసనంతా మౌనంలోనే ఆస్వాదిస్తూ.
3102. చిటపటపువ్వుల్లా రెప్పలు..
నీ కన్నుల్లో మతాబులు తిలకిస్తూ..
3103. పూటకి వాడిపోతేనేమి పువ్వులు..
ఆధారమైన దారం తోడుండగా..!!
3104. a స్వీయగానం మొదలెడితే సరిపోతుందేమో..
బృందగానానికి జనాలకి తీరికెక్కడిదీ
3105. కలస్వనాలై ఎగిసిన నా నవ్వులు..
నీ హృదయంలో ప్రతిధ్వనించే వేళ
3106. సఫలంకాని స్వప్నాన్ని విడిచిపెట్టాలందుకే..
జీవితమింకా ముందుందనే ముందడుగేస్తూ.
3107. మనశ్శాంతి కరువైన లోకమిది..
వర్షపు చప్పుళ్ళకీ ఉలిక్కిపడుతూ.
3108. పదాలకెంత పొందికో..
ప్రాయశ్చిత్తానికీ చిరునవ్వు సాయంతో ప్రణమిల్లుతూ
3109. ఆనందభాష్పాలెన్నో చదివా నీ నయనాల్లో..
నాతో నువ్వున్నప్పుడు సంతోషాలే కురిసాయని..
3110. వెక్కిరింతలెందుకో నా జ్ఞాపకాలంటే..
నీడల్లోనూ నిద్దర్లోనూ వెంటొస్తాయని.
3111. ..జ్ఞాపకాలకే అలజడెందుకో..
జలగలై పీడించలేదుగానని
3112. తలపును సజీవం చేసానందుకే..
నీలో భావాలు అడుగంటకూడదని..
3113. పరిమళించే కొన్ని కలలు..
పరాకుగానైనా తమను ఆస్వాదించమంటూ
3114. మృత్యుంజయుడు వాడే..
ప్రేమపాశాన్ని కానుక చేసిన చిదంబరుడు..
3115. ఎదురుచూపులు మానేసా..
గతం రాల్చిన కన్నీటిచుక్కలు చేదయ్యాక..
3116. చూపులను చదువుతున్నా..
మాటలైతే మనసు మాయ చేయొచ్చని..
3117. వేకువరేఖలకై ఎదురుచూపులందుకే..
నీ మనసులోకి మార్గం చూపెడతాయని..
3118. అరచేతిలో అక్షరజాలం..
కాలు కదపకుండానే చేసిందిగా ఇంద్రజాలం..
3119. ఊసులు ఘొల్లుమన్నాయి..
ఊహలలో ఇమడలేక..
3120. తీపిగాయాలేమని చెప్పుకోనూ..
ప్రతీకోణంలోనూ పదునైన బాణాలనే ఎక్కుపెడుతుంటే..
3121. మెరిసిపోతోంది నీ మనసు..
దీపావళి దివ్వెలనే తలదాన్నేలా...
3122. ప్రియసఖినే నేను..
ప్రియమార నీ మాటలను గ్రోలేవేళ..
3123..తెల్లబడిపోయిన నా కనుపాపలు..
నీ మౌనాన్ని చదివీచదివీ.
3124. ఎందరసురులో..
కలికాలంలో మేకతోలు కప్పుకు తిరుగుతూ..
3125. నేల రాలిన నక్షత్రాలను హత్తుకున్నా..
చిద్రుపలైన నా కోరికలు తీరునేమోనని..
3126. తెగుళ్ళను తెగనరికేసా..
దిగుళ్ళను సాగనంపి సంతసాన్ని సాధించాలనే..
3127. కమలాలై విచ్చుకుంటున్న కలలు..
అమ్మానాన్నల ఆశీర్వాద బలముతోనే..
3128. నీ గుర్తింపుకు నోచుకోని నేను..
కాకుల గుంపులో కలగలిసిన కోయిలలా..
3129. పారిజాతాలపూజైతే ఫరవాలేదనుకున్నా..
నీ ఆరాధన సఫలం చేసేద్దామని..
3130. నా భావం ఉరకలేస్తోంది..
నీ మానసాన్ని తలచుకొని..
3131. సైకతమై మిగిలిపోయా ఒడ్డునే..
శిలగా మలచినా రాలిపోతూ..
3132. సున్నితంగా మారెనెందుకో నా మనసు..
నీ చూపుకు చెక్కిళ్ళను చేరవేస్తూ..
3133. కాకుల గుంపులో కలగలిసిన కోయిలనయ్యా..
నీ చెవిటిదనం ముండు పాడిపాడి..
3134. దీపావళినని చెప్పి పొరపాటు చేసా..
ఈ నెల్లాళ్ళూ వెలగమంటావని తెలియక..
3135. అభిషేకానికి సిద్ధమయ్యావెందుకో..
కార్తీకం నాకు ప్రియమని కనిపెట్టినందుకా..
3136. నా కన్నులకెంత బెదురో..
మౌనమంతా ముఖంలోనే వెక్కిరిస్తుంటే..
3137. కావ్యకన్నెనని పొగిడినప్పుడే అనుకున్నా..
భావాలన్నీ భజనల్లో చేర్చేసావని..
3138. కన్నీళ్ళతో కళ్ళాపి జల్లావనుకున్నా..
చిరునవ్వులను రంగవల్లులు చేస్తానని..
3139. క్షణాలనెందుకు కవ్విస్తావో..
ఖర్చుకు వెనుకాడక దరి చేరమంటూ..
3140. వెలుగులదెవ్వెనై విచ్చేసానందుకే..
ప్రమిదల ఖర్చు నీకు మిగులుద్దామని.
3141. మాలికలు మెరిసేదందుకేననుకున్నా..
దూరమైన మనసులనూ దగ్గర చేస్తాయనే
3142. ఆత్మీయస్పర్శను కాదనలేకున్నా..
మాలికల్లో సజీవమై మదిని తడిమాయని..
3143. అలరించే భావాలెన్నో..
అల్లంతదూరంలోనూ అనునయిస్తూ..
3144. గుండెసవ్వడి నెమ్మదించింది..
గోరంత ప్రేమ నాదని వెక్కిరించావని..
3145. కార్తీకమని కనిపెట్టుకోమంటున్నా..
మనసెక్కువ నానితే మోక్షానికి దగ్గరవ్వొచ్చని...
3146. పిసినారి ప్రేమికుడివని ఒప్పుకున్నా..
మాటలతోనే బలాన్ని పంచేస్తుంటే..
3148.  జ్ఞాపకాల సుడులలో చిక్కుకున్నా..
మనసు తూనీగై నిన్నసరిస్తుంటే..
3149. అవేదనంతా అమృతమేగా..
నువ్వూ నేనూ రెండక్షరాల ప్రేమయ్యాక..
3150. నవ్వులతో కవ్విస్తావెందుకో..
చూపులకే నే చిత్తరువునై నిలుచుంటే....................................... ********.....................................