ద్విపదాలు : 2951 నుండి 3000 వరకు

..................................... ********.....................................
2951. సాహితీ సమ్మేళనమేగా..
మదిలో కవిత్వం ఆకాశమై విస్తరిస్తుంటే..
2952. తొలి పరిచయం నువ్వే..
తేనెపదాలతో మనసును కొల్లగొడుతూ..
2953. ఎన్ని భావాలు బహిర్గతమైతేనేమి..
మెచ్చే మనసులు కరువైనప్పుడు..
2954. నీ తలపులను దాచుకున్న వైనం..
నా మనసులోని మహా మౌనం..
2955. చందమామని వెనకేసుకొస్తున్నావెందుకో..
విరహహిణులను వేధించడంలోని మెళకువలు నీకు ఉచితంగా నేర్పినందుకా..
2956. ఆ జీవితం ధన్యమే చచ్చినా..
ఒక్క నలుగురి స్మృతులలో బ్రతికున్నా.
2957. దారితప్పిన శ్వాస..
నీలో నన్ను వెతుక్కుక్కోవాలనే తొందరలో..
2958. ఏకాంతం చేదవుతోంది..
కరువైన పలకరింపులు భావోద్వేగాన్ని వెక్కిరిస్తుంటే..
2960. ఉలికందని శిల్పంగా మిగిలిపోయా..
నీ కలానికి దూరమైనందుకే..
2961. నా కనులకు కలతే..
నీవు అలుసు చేస్తే
2962. మౌనం మరలిపోయింది..
విషాదం వేడుకవ్వగానే
2963. వాస్తవం వెక్కిరించినందుకేమో..
నీకు నువ్వే మల్లెల దారేసుకుంటూ..
2964. చినుకుల ముత్యాలేగా జ్ఞాపకాలు..
నిన్ను తలచినంతనే జారిపోతూ..
2965. దేవుడిఆటెంత క్లిష్టమైనదో..
నిరంతరం సంబంధాల్ని గెలిపించాలనే ఆరాటంలో..
2968. కట్టె కాలాకే కన్నీరొలికేది..
ప్రేమను గుర్తించగలిగే క్షణమదేనని..
2969. మందహాసాన్ని వీచానందుకే..
సంధ్యా సమయానికి దిగులు దూరమవుతుందని..
2970. సాంబ్రాణీ వేసుకోవడం మానేసా..
కళ్ళగంతలు కట్టినా కనిపెట్టేస్తున్నావనే..
2971. పరిమళాల పిచ్చి పట్టిందెందుకో..
మల్లెలగంపలో మత్తుగా పడ్డందుకా..
2972. నా నుంచీ తీసేసా నన్ను..
ఏకాకిని చేసి అందరూ నవ్వుతున్నారనే..
2973. ప్రేమకవితనే పల్లవి చేసేసా..
వలపుగీతం వసంతమై విచ్చేసిందనే..
2974. ఒంటరితనం పరుగు తీస్తోంది..
ఓటమిని తప్పించుకు పారిపోవాలనే..
2975. చెలిమి చేవ్రాలు చేసింది..
నాకు నీవున్నావనే సంకేతంగా..
2976. గేలి చేసా ఏకాంతాన్ని..
చందమామలా నువ్వు చేరువయ్యావని..
2977. మారాకు వేసింది ఆనందం..
శిశిరాన్ని నువ్వొచ్చి తరిమేసాక
2978. ఏకాంతాన్ని ఏకరువుపెడుతున్నా..
వెన్నెల్లో విరహాన్ని భరించలేని తపనల్లో..
2979. నిన్నలా లేను..
నీ గుండెసవ్వడికి దూరమైన నేను..
2980. ఉలిపచ్చినవ్వులు నీవేననుకుంటా..
నాలోని ఆనందాన్ని ప్రత్యేకంగా అభినందించినట్లు
2981. మనసు మాట వినదని ఋజువైంది..
పిల్లిలా కళ్ళుమూసుకొని నీవెంట పడుతుంటే..
2982. దయలేని స్మృతులు..
జీవితాన్ని దయానీయంగా మార్చి వినోదిస్తూ..
2983. పూటకి వాడిపోతేనేమిలే పువ్వులు..
ఆధారమైన దారం తోడుండగా..
2984. నయనాలు నీరయ్యాయి..
నీడల్లో నీ రూపం అలుక్కుపోయినందుకే..
2985. ఆకలి ఎరుపు..
కైపెక్కిన ఆకళ్ళను క్రోధంతో వెక్కిరిస్తూ..
2986. ఆల్చిప్పలవుతూ నా కళ్ళు..
నువ్వొస్తే బంధించాలనే ఆత్రంలో..
2987. పన్నీటిని తాగలేకపోయా..
సువాసనకే గానీ దాహం తీర్చలేవని..
2988. కలత బారిన కన్నులే నావి..
నీ కలలకు దూరమైన నిదురలా..
2989. ఏదోనాడు  తప్పక వస్తావనే వేచున్నా..
అడుగు కదపలేని అసహాయతలో నేను..
2990. ఎర్రసిరా పోసిన కలమనుకుంటా..
మాటల్ని మంకెనలుగా మార్చేస్తూ..
2991. నీ ఊసుల సరిగమలు..
ప్రతిరాత్రినీ కచేరీగా మారుస్తూ..
2992. అక్షరమైతే నా నేస్తామే..
తన ఊసులను పంచగలుగుతున్నందుకు..
2993. నిన్ను కోల్పోయాకే..
నన్ను నేను ప్రేమించుకోవడం మొదలెట్టా..
2994. నిన్ను కోల్పోయాకే..
మౌనాన్ని చేరదీసి శిశిరానికీ లోకువయ్యా.
2995. నిన్ను కోల్పోయాకే..
జాతకాల జాడల్లో అదృష్టాన్ని వెతుక్కుంటున్నా..
2996. అక్షరాలకు ఓదార్పు తేలికయ్యింది..
మనసు విశ్రాంతిగా కూర్చుందనే..
2997. మౌనానికని మాటేస్తున్నా..
మాటలతో నీకు మొహం మొత్తిందనే..
2998. తడబడని అడుగులు..
గమ్యమెరిగినట్ట్లు నీ వైపు దూసుకొస్తుంటే..
2999. పూసంత నవ్వినప్పుడే పువ్వునైపోయా..
మాలికగా మారి నిన్నలరించాలని..
3000. జీవితం వ్యర్ధమే..
ఋతువులను గుర్తించడం మనసు మరచిపోయాక..
..................................... ********.....................................